TARIRA í Hoyvíkar kirkju

Mikukvøldið 29. mai kl. 20 verður konsert við TARIRA í Hoyvíkar Kirkju.

Á skránni er føroyskur kórtónleikur, umframt renaissansutónleikur. Føroysku tónaskøldini eru Kári Bæk, Sunnleif Rasmussen, Pauli í Sandagerði, Tróndur Bogason, Unn Patursson og Anne Mette Greve Klemensen.

TARIRA vann heiðurin sum Føroya besta kór á kórfestivalinum, sum varð hildin í Varpinum í apríl í ár, og í juni fer kórið á konsertferð til London og Cambridge.

Meira um kórið:
TARIRA er eitt kamarkór við staðseting í Tórshavn. TARIRA var stovnað í 2002 og telur kórið 20 sangarar, ið hava drúgvar royndir sum kórsangarar og innan tónleik yvirhøvur.

Tarira setur stóra æru í at bíleggja nýggj verk frá føroyskum tónaskøldum og á tann hátt gera kórrepertoirið í Føroyum meira fjølbroytt, áhugavert og viðkomandi fyri komandi ættarlið av kórsangarum og tónaskøldum. Kórið hevur eisini lagt stóran dent á at fara út um landoddarnar at framføra føroyskan tónleik og vísa á, hvat rørir seg á føroyska kórpallinum.

4.-8. juni 2024 fer TARIRA á konsertferð til London og Cambridge. Konsertskráin er fyri ein part samansett av renaissansutónleiki. Tað krevur nógv av kórinum, at syngja júst hesi stykkini í einum landi, ið hevur stolta traditión fyri júst hesi sjangruni.

Umframt renaissansutónleik, er føroyskur tónleikur eisini á skránni. Hesi stykki eru útvald soleiðis, at lurtarin fær innlit í, hvat rørir seg á føroyska kórpallinum í løtuni. Tónaskøldini eru Kári Bæk, Sunnleif Rasmussen, Pauli í Sandagerði, Tróndur Bogason, Unn Patursson og Anne Mette Greve Klemensen.