Varisliga verður latið uppaftur - tilmæli Covid-19

Eftir skerdar umstøður í drúgva tíð, fara vit varisliga aftur til kendar mannagongdir í kirkjunum. Vit hava lært at handfara støðurnar, so vit velja ikki at skriva í smálutir. Um ivamál taka seg upp, eru tit vælkomin at tosa við dómpróstin ella biskupin í nevndu raðfylgju.

Kirkjuráðið hevur saman við kirkjunnar tænarum ábyrgd av:

• At reinføri er gott, t.d. nýtsla av spritti og pappíri til hendurnar.
• At vit sita í hóskandi frástøðu – 1 metur. Tó, fólk úr sama húsi kunnu sita saman. Hetta er galdandi til gudstænastur, jarðarferðir, brúðarvígslur og konsertir.
• At sitið verður á øðrum hvørjum beinki í skipinum.
• At hámarkið í teimum stóru kirkjunum til gudstænastu, jarðarferð, brúðarvígslu og konsertir í mesta lagi er 200.
• At hámarkið í teimum miðalstóru kirkjunum til gudstænastu, jarðarferð, brúðarvígslu og konsertir í mesta lagi er 90.
• At hámarkið í teimum smærri kirkjunum til gudstænastu, jarðarferð, brúðarvígslu og konsertir í mesta lagi er 50.
• At frámerki vísir staðið/støðini har sitið verður í beinkinum ella ikki verður sitið.
• At talvan ikki gongur í kirkjunum.

Sóknarpresturin hevur ábyrgd av:

• At kunna kirkjufólkið av prædikustólinum um týdningin av frástøðu og reinføri við atliti at gudstænastum og kirkjuligum tænastum.
• At minna um frástøðu á veg inn í kirkjuna, í kirkjuni og tá ið farið verður úr kirkjuni.
• At ásetta hámarkið av fólki verður hildið til gudstænastu, jarðarferð, brúðarvígslu og konsertir.
• At kór og sangarar hava 1 metur ímillum sín.
• At altargangurin fer fram undir serligari og tryggari skipan, ið presturin er kendur við.
• At dópsins sakramenti verður umsitið í góðum samskifti við tey avvarðandi uttanfyri gudstænastuna / hámessutíð. Fólkatalið verður ásett alt eftir støddini á kirkjuni.
• At fleiri børn kunnu verða doypt í senn undir somu kirkjuligu handling treytað av, at hámarkið í kirkjuni verður hildið. Neyðugt er, at frástøðan 1 metur er ímillum dópsfylgini.
• At brúðarpørini til kirkjuliga vígslu verða kunnað um galdandi ásetingar, so tey kunnu taka medábyrgd av, at hámarkið verður hildið. At frástøðan verður hildin.
• At tey avvarðandi við andlát og jarðarferð verða kunnað um galdandi ásetingar, so tey kunnu taka medábyrgd av, at hámarkið verður hildið. At frástøðan verður hildin.
• Sóknarpresturin hevur evstu ábyrgd av tí, sum fer fram í kirkjuni við atliti at gudstænastu, dópi, vígslu og jarðarferð. Tað merkir, at sóknarpresturin sum embætismaður (m/k) er myndugleikin.

Mett verður ráðiligt:

• At kirkjukaffi, ervi og hugnaløtur kunnu verða í kirkjukjallarum og kirkjuhúsum. Tilmælini um frástøðu, reinføri og fólkatal skulu haldast.
• At konsertir kunnu verða í kirkjunum. Tilmælini um frástøðu, reinføri og fólkatal skulu haldast. Harafturat skulu tríggir teir fremstu beinkirnir standa tómir.
• At sálmabókin verður nýtt til gudstænasturnar (hámessuna) sunnudag.
• At kirkjan eftir avtalum og skipaðum viðurskiftum er opin fyri ferðandi.
• At vøggusálmasangur kann vera í kirkjuni sambært tilmælunum, t.d. reinføri. Frástøðan skal vera 1 metur ímillum tey luttakandi, meðan sungið verður.
• At skrúðugudstænastur, annað barnavinarligt virksemi og fyrilestrar kunnu vera í kirkjuni. Eyðvitað mega almennu tilmælini haldast.

Hámarkið / fólkið skipað í bólkar.
Hámarkið fyri at savnast á einum staði er 200 fólk. Ynskiligt er, at kirkjurúmið verður skipað í bólkar (sektiónir), sum eru hvør fyri seg.

Konfirmatión:

1. Mælt verður til, at konfirmatiónirnar ikki eru almennar í vanligum týdningi, men at tær ístaðin eru gudstænastur fyri komfirmantinum og hansara / hennara nærmastu.
2. Sitið verður á øðrum hvørjum beinki.
3. Frástøðan 1 metur eigur at verða hildin. Reinføri er alt avgerandi.
4. Konfirmatiónirnar verða teir dagarnar, ið eru lýstir og ásettir.
5. Tey stóru holdini verða býtt sundur, so í mesta lagi 10 konfirmantar verða konfirmeraðir undir somu gudstænastu.
6. Á størri plássum við stórum kirkjum verða holdini konfirmerað í somu kirkju t.d. kl. 10, 12 og 14.
7. Kirkjan verður gjørd rein og sprittað eftir hvørja konfirmatión.
8. Talið, ið konfirmanturin hevur við sær í kirkjuna verður avmarkað, t.d. foreldur, systkin, ommur og abbar samsvarandi hámarkinum hjá kirkjuni.
9. Konfirmantarnir hava ikki fysiska kontakt hvør við annan ella onnur.
10. Almennu tilmælini um frástøðu, reinføri og avmarkað fólkatal eru galdandi.
11. Sóknarpresturin tekur ikki í hondina á konfirmantinum. Presturin signar konfirmantin við krossins merki ístaðin fyri handaálegging.
12. Sóknarpresturin hevur ábyrgdina av konfirmatiónini og løtuni í kirkjuni.

Tórshavn 5. mars 2021

Uni Næs, dómpróstur
Jógvan Fríðriksson, biskupur