TÍÐINDASKRIV FRÁ FØROYSKA BÍBLIUFELAGNUM

Nú er møguleiki hjá øllum føroyingum, at lesa og gera viðmerkingar til nýggju føroysku bíbliuumsetingina.

Leingið hevur hon verið ávegis, og nú er komið so langt, at til ber at lata alt Føroya fólk, úti sum heima, lesa 1. Mósebók í nýggju týðingini av Bíbliuni. Tilfarið er lagt út á heimasíðuna hjá Føroyska Bíbliufelagnum www.biblia.fo, har til ber at taka PDF-útgávu av 1 Mósebók niður. Viðmerkingar til tilfarið kunna sendast á teldupostin biblia@biblia.fo.

Tað var í 2016, at Hans Jacob Joensen, biskupur, sum andaðist beint fyri jól í fjør, var liðugur at umseta alla Bíbliuna, uttan Sálmarnar, til føroyskt. David Johannesen, prestur, hevur síðani týtt Sálmarnar.

Tað er stórarbeiði at týða úr hebraiskum máli, sum Gamla Testamentið er skrivað á og úr grikskum, sum Nýggja Testamenti er skrivað á. Arbeitt verður við at lesa alla Bíbliuna ígjøgnum við atliti til gudfrøðiliga trúvirðið, góðan málburð og orð, áðrenn útgávan verður løggild og útgivin.

Nógv fólk í og uttanfyri Føroyar úr ymsum kirkjum og samkomum taka lut í arbeiðinum.

Føroyska Bíbliufelagið takkar øllum tykkum hjartaliga fyri ágrýtni og offurvilja í verkinum.

Fíggjarliga avbjóðingin er stór, so hóast fleiri longu hava stuðlað Bíbliuútgávuni, er framvegis tørvur á at fáa stuðul til verkætlanina. Til ber at stuðla við at flyta á kontu hjá Bíbliufelagnum í Betri 9181-4929227.

Ætlanin er at nýggja Bíblian skal koma út í 2023.

Meiri kunning fæst við at venda sær til aðalskrivaran hjá Føroyska Bíbliufelagnum, Gunnar K. Nattestad á tlf. 787826.

www.biblia.fo