Páskavøka í Sandavágs kirkju

Meðan vit bíða eftir, at Frelsarin, sum fór til heljar langafríggjadag, páskamorgun kemur aftur úr helheimi við øllum sínum fylgi, verður páskaaftan hildin páskavøka í Sandavágs kirkju.

Páskaaftan klokkan 20.00 verður farið í kirkju í Sandavági at halda páskavøku, sum er kvirra, upplestur og sangur.

Páskavøka verður hildin til minnis um Jesu niðurferð til heljar, har hann dvaldist, til hann aftur reis upp páskamorgun.

Hendan serliga minnisløtan í kirkjuni fer at skifta millum kvirru, lestur og sang frá kirkjuliðnum og mansrøddum, sum upp á skift millum lestrarnar fara at syngja nøkur vers í senn úr nr. 628, og sálmin nr. 627, sum báðir eru miðaldartekstir úr fornkirkjuni, ið umvegis enskt og dansk eru týddir til føroyskt.