Minningarhald, sjólátin

Formæli:
Eftir áheitan frá biskupi var fundur í biskupsgarði hin 4. desember 2014. Umboð fyri Løgmansskrivstovuna, Reiðarafelagið, Maskinmeistarafelagið, Fiskimannafelagið, Stuðulsgrunnin fyri Óarbeiðsførar Fiskimenn, Vørn, MRCC, Mentamálaráðið, Skipara og Navigatørfelagið, Sjómansmissiónina, biskupur og starvsfólk hansara umrøddu
minningarhaldið fyri sjólátnar Føroyingar og ábyrgdina av listanum við nøvnum teirra, ið farin eru.

Ásannandi, at skipanin var farin á glið, og at neyðugt var at gera almenn metingarstøði, so at neyvt ber til at siga, hvør skal verða nevndur á listanum, var semja um at seta eina nevnd at gera uppskot til metingarstøði, grundað á gomlu løgtingssamtyktina og á umrøðuna á fundinum.

Í nevndini skuldu vera:
• eitt umboð fyri manningarfeløgini og Reiðarafelagið,
• eitt umboð fyri Vørn
• eitt umboð fyri Mentamálaráðið og Løgmansskrivstovuna,
• eitt umboð fyri Fólkakirkjuna og Sjómansmissiónina.

Í nevndina komu:
• Anfinnur Garðalíð fyri manningarfeløgini og Reiðarafelagið,
• Edvard Bjarnason fyri Vørn,
• Bergur Berg fyri Mentamálaráðið og Løgmansskrivstovuna,
• Torleif Johannesen fyri Fólkakirkjuna og Sjómansmissiónina

Nevndarviðgerð:
Nevndin hevur havt tveir fundir, umframt nakað av skrivligum samskifti. Semja er í nevndini um, at neyðugt er, at greiðar avmarkingar eru fyri, hvør kemur á listan, so at ivamálini verða so fá, sum til ber.

Óneyðug umrøða skal ikki vera um, hvør eigur at verða nevndur á listanum. Uttan mun til, hvar markið verður sett, kann altíð finnast okkurt markamót, har ivi kann verða um, hvør kemur á listan ella ikki. Tí er neyðugt, at støðið undir listanum eru greiðar reglur, so ivamálini eru so fá, sum til ber.

Somuleiðis er semja um, at tann týdningur, sum eftir øllum at døma upprunaliga var ætlaður at leggja í hugtakið ”sjólátnir” við einmæltu løgtingssamtyktini, framvegis hevur so stóran týdning, at hetta er støðið, sum gingið verður út frá.

Listin er til almenna minningarhaldið hin 1. november, har bæði løgmaður og biskupur luttaka.

Einki er til hindurs fyri, at minningarhaldini kring landið annars kunnu vera hildin um onnur, sum eru farin, uttan mun til um tey eru við á hesum lista.

Av tí at talan er um eitt føroyskt minningarhald, ber illa til – vísandi til løgtingssamtyktina í 1948 “.....til minnis um sjólátnar Føroyingar” – at finna aðra avmarking enn við fortreytina um at tann, sum kemur á listan, býr í Føroyum.

Ásannandi, at samfelagið er eitt heilt annað, enn tá ið hetta minningarhaldið byrjaði, var semja um hesar fortreytir og hesa allýsing:

Tann, sum kemur á listan:

Skal vera skrásettur hjá Landsfólkayvirlitinum at búgva í Føroyum.
Skal hava latið lív í sínum yrki á sjónum, av sjúku ella vanlukku.

Allýsing:
Á sjónum merkir her á skipi, báti, øðrum vinnustaði á sjónum, ella í sjónum.

Við hesum sendir nevndin, sum varð sett at gera biskupi uppskot til metingarstøði um, hvør eigur at verða nevndur á listanum, sum verður lisin upp á almenna minnigarhaldinum allahalgannadag, umbidna uppskotið.

= = =

Biskupur takkar nevndini fyri væl úr hondum greitt arbeiði. Somuleiðis tøkk til øll tey, ið við tign og sømd hava verið við í málsviðgerðini av hesum viðkvæma álvarsmáli.

JF