Matiné í Havnar kirkju

Leygardagin 08. aug. kl. 11.30 Matiné í Havnar kirkju
við Hans Marius Weihe Ziska og Heðin Ziska Davidsen

Teir báðir Hans Marius Weihe Ziska (vocal, guitar), Heðin Ziska Davidsen (guitar) eru báðir kendir tónleikarar í Føroyum.

Hans Marius Weihe Ziska er bæði sangskrivari og sangari. Hann framførir bæði sum einstaklingur og í tónleikabólkum, eitt nú í bólkinum Marius. Hansara tónleikalívsleið byrjaði, tá hann sum 16 ára gamal luttók í Prix Føroyar við Flux. Síðan hevur hann framført á konsertum og tónleikafestivalum bæði í Føroyum og í øðrum londum, eitt nú í Danmark og Týsklandi.

Tað var við sigrinum í føroysku GBOB kappingini, at Marius veruliga gjørdist kent navn millum føroyingar. Í GBOB heimsfinaluni í London fekk bólkurin eitt deilt sætta pláss. Marius gjørdist besti norðurlendski bólkur framman fyri Noreg, Svøríki, Danmark, Finnland og Ísland. Hetta var við til at gera, at Marius var í uppskoti til planetirnar fyri besta nýggja bólk og besta bólk á Planet Awards hetta árið.

Heðin er best kendur sum rock guitaristur við áhuga fyri øðrum tónleiki sum metal og jazz. Hann byrjaði longu sum10 ára gama at skriva smáar tónleika stubbar. Í 1993 byrjaði hann at komponera jazz tónleik og gav út sín fyrstu fløgu

Síðan flutti han til Danmarkar at lesa tónleik og tá ið han kom aftur til Føroya gav hann út sína aðru fløgu við heitinum “Tjant”. Eisini ein jazz fløga ávirkað av rock og folk.
Síðani 2005 hevur hann eisini arbeitt electro-akustiskum og cross-over tónleiki. Hann gav út triðju fløgu sína 2007 við heitinum “Tjant – ein strála av ljósi”. Hesaferð við meira akustiskari tilgongd til tónleikin.

Spennandi verður at vita, hvat hesir báðir royndu tónleikarar fara at bjóða okkum í Havnar kirkju leygardagin.

.