Jústinus skrivar um kirkjutænarar.

Sum sæst nakað miðskeiðis á forsíðuni hjá fólkakirkjuni, byrja vit ein nýggjan tátt, har kirkjutænararnir verða avmyndaðir og lýstir í fáum orðum.

Vit koma runt alt landið, og allir kirkjutænarar, ið eru á lívi, verða umrøddir. Teksturin byggir á samrøðu. Vegna tvørrandi heilsu verða nakrir tænarar ikki umrøddir í fyrstu syftu. Vónandi finna vit eina smidliga loysn, so eingin verður gloymdur.

Vinarliga sigið biskupi frá, um vit av óvart gloyma onkran. Altíð sárt at vera gloymdur burtur.

Allar greinarnar um kirkjutænararnar verða samlaðar undir tí kirkju, har tænarin er tænari.

Um vit t.d. fara inn undir bjálkan “Kirkjur og prestar”, finna vit greinina um Eivind Petersen undir Oyndarfjarðar kirkju. Fara vit til høgru undir “Kirkjurnar í Føroyum”, finna vit somu grein. Sostatt er lætt at finna greinarnar aftur, tí tær verða savnaðar hjá viðkomandi kirkju.

Jústinus Eidesgaard, rithøvundur og fjølmiðlafólk, skrivar og avmyndar kirkjutænararnar. Vit í umsitingini hjá fólkakirkjuni fegnast, nú dreymurin gerst veruleiki. Kirkjutænararnir eru ein holl og dygg súla undir fólkakirkjuni í Føroyum.

JF