Jóhannes Ellingsgaard, „Deknurin" 80 ár

Hin 1. oktobur 2012 fylti Jóhannes Ellingsgaard, „Deknurin", Klakksvík 80 ár.
Jóhannes er ættaður av Eiði, sonur Hans J. Ellingsgaard, trúboðara og dekn í mong ár við Eiðis kirkju, og Katrinu Davidsen úr Tjørnuvík.

Jóhannes var í snikkaralæru í Klakksvík og tók við sum deknur eftir Samson O. Samson í gomlu kirkjuni á Ziskatrøð. Haðani stavar tilnavnið „Deknurin", sum øll kendu. Jóhannes helt fram í ólønta starvinum sum deknur í Christianskirkjuni, til hann flutti niður til Danmarkar í 1977 at vera løntur kirkjutænari á Endelave, har ið Tummas Jacobsen var sóknarprestur eftir Busch, sum báðir høvdu verið prestar í Klakksvík. Í Danmørk fekk Jòhannes sær útbúgving sum kirkjutónleikari og urguspælari í Løgumkloster. Eftir 1 ár við Helligåndskirkjuna í Keypmannahavn og 6 ár í Hørsholm sókn sum kirkjutænari fluttu Jóhannes Ellingsgaard og konan Osla aftur til Føroya, tí at Jóhannes var settur í starv sum leiðari á nýggja varda verkstaðnum á Brekku í Klakksvík, har ið Jóhannes kom at verða í 11ár, til hann fór frá við eftirløn.

Afturkomin til Føroya varð Jóhannes beinanvegin biðin um at spæla í Eiðis kirkju saman við Hans Erlandi í Brekkunum og stutt eftir settur í ólønt starv sum urguleikari við Kunoyar kirkju. Har byrjaði Jóhannes sum urguleikari 4. s. e. trin. hin 18. juni 1989, tá ið kirkjan hevði fingið nýggja urgu, og har spælir Jóhannes framvegis hvønn sunnudag umframt við andaktir á sjúkrahúsinum, røktarheimi og sambýlum.

Jóhannes hevur gjørt eitt stórt lønarleyst arbeiði í kirkju okkara eins og fedrar hansara. Bæði pápin og langabbin, Hanus í Garði á Eiði, vóru deknar við Eiðis kirkju í nógv ár. Jóhannes er og hevur øll árini verið væl stuðlaður av konu síni Oslu f. Arge og døtrunum Katrinu og Marnu.
Føðingardagurin verður hildin leygardagin hin 6. oktobur kl. 18 í Emmaus í Klakksvík.