Bíbliuorðabók komin út

Mánakvøldið 10. december varð ein bíbliuorðabók løgd fram í Sandavágs kirkju. Aftan á framløguna var samkoma í SÍF húsinum, har møguleiki var fyri at ogna sær bókina

Tað er Jóhannes Haraldsen, sáli, úr Sandavági, sum hevur greitt hetta stórverkið úr hondum. Og stórverk má tað av sonnum sigast at vera. Bókin telur ikki færri enn 929 síður, og leitiorð og tilvísingar eru heili 82.873 í tali. Umframt eru kort og listi yvir vekt og mát, ið brúkt eru í bíbilskum samanhangi.

Tað hevur sjálvandi ikki verið løtuverk at greitt hetta arbeiði úr hondum, og í lýsing síni av høvundanum, sigur bygdarmaður hansara, Knút Olsen, at hann helst er farin undir verkið einaferð í fimmtiárunum í seinastu øld, so liðin er meira enn hálv øld frá byrjan, til verkið nú er givið út. Sjálvandi er nakað síðan, Hannus, sum hann vanliga varð nevndur, hevur latið verkið frá sær, tí hann andaðist í 1994, og áðrenn tað hevði hann havt samband við kirkjuligar myndugleikar um at fáa verkið givið út.

Á samkomu í Sandavágs kirkju greiddi Svenning Tausen, umboðandi Føroyskt Kirkjumál, ið hevur givið bókina út, frá søguni um Bíbliuorðabókina. Hann nevndi, at ein onnur, væl minni, bíbliuorðabók, grundað á umseting Victors Danielsens, er komin út fyrr. Tað var Sigurd Berghamar, sum gjørdi hana.

Løtan í kirkjuni byrjaði við innleiðing við Una Næs, dómprósti. Síðan varð felagssálmur sungin. Holgar Jacobsen spældi eitt av egnu løgum sínum, og Svenning Tausen kunnaði um bókina. Eftir at Holgar Jacobsen aftur hevði spælt eitt lag, varð fyrsta eintak av Bíbliuorðabók Hannus Haraldsens úr Sandavági handað Sandavágs kirkju. Heini Petersen, formaður í kirkjuráðnum, tók ímóti og takkaði við hugleiðing um høvundan. Endað varð við felagssálmi.

Síðan varð farið í felagshúsið hjá Sandavágs Ítróttarfelag, har møguleiki var fyri at fáa sær ein kaffimunn og keypa bókina.

Bíbliuorðabókin er givin út av grunninum Føroyskt Kirkjumál. Hon er sett upp og pentað á Føroyaprent, og kostar kr. 400,- í bókabúðunum.

Orð: EíSJ

Sí fleiri myndir