Ætla at fara allan vegin

Á fundi mánakvøldið samtykti Høvuðsstýrið hjá Kirkjuligu Heimamissiónini at fremja alla útbyggingina av Leguhúsinum í Nesvík uttan steðg.

Fyrsta byggistig, sum TN Bygging nú er væl í gongd við, fevnir um eina kombihøll, sum bæði skal kunna nýtast til fyrilestrar, møtir og konsertir, har umleið 500 fólk kunnu sita, og til ítrótt og annað spæl. Annað byggistig, sum avgerðin mánakvøldið snúði seg um, fevnir um eina kamarslon við 12 hjúna- og familjukømrum, umframt ein millumbygning við stórum og opnum felagsøki í erva, og brúsurúmum og goymslurúmum í neðra. Triðja byggistig er, at sjálvboðin gera síðsta partin av innrættingararbeiðnum í kamarslonini.

Fyrimunirnir við at fremja alla ætlanina í einum eru fleiri. Samlaði kostnaðurin verður lægri, dygdin á arbeiðnum verður betri, og ikki minst fáa børn, ung og vaksin skjótast gjørligt gleði av væl betri og størri karmum til legur og alskyns onnur tiltøk.

Tá lendið var keypt og gjørt byggibúgvið, varð sjálv útbyggingin mett at kosta umleið 26 mió. kr. Við tí peningi, sum Heimamissiónin hevði sett av frammanundan, umframt tí peningi, sum er komin inn síðani oktober 2014, mangla 15,4 mió. kr. til at fremja alla verkætlanina, tá alt er tikið við. Seinastu tíðina eru nógvar gávur komnar inn til endamálið, bæði einstakar gávur og fastar mánaðargávur. Pr. 14. november eru teknaðar 93.375 kr. um mánaðin í føstum gávum. Heimamissiónin hevur havt gott samskifti við peningastovnarnar og nú verður avtala gjørd um lán av størsta parti av hesi restupphædd.

Samstundis er umráðandi at gera vart við, at komið er ikki á mál enn við innsavningararbeiðnum, men at tørvur er á væl fleiri gávum. Leiðslan hevur tí tikið hesa avgerð í tí trúgv og væntan, at enn fleiri gevarar vilja vera við til at stuðla hesi framskygdu ætlan, uttan at nøkur fíggjarlig óráð verða tikin fyri. Miðvísa átakið at eggja fólki til at tekna fasta mánaðargávu, ella at stuðla á annan hátt, heldur tí fram.

Sambært tíðarætlanini verður høllin klár at taka í nýtslu seint næsta summar, og allur bygningurin um ársskiftið 2017-18.