4 umsøkjarar.

Á fyrsta sinni er søkt eftir sóknarpresti til Suðurstreymoyar norðara prestagjald. Talan er um kirkjusóknirnar í Hoyvík og Kaldbak. Prestagjaldið er tað yngsta í landinum. Tað var landsstýrismaðurin Bjørn Kalsø, ið eftir ynski frá kirkjuligu myndugleikunum staðfesti og skipaði prestagjaldið.

Prestagjaldið er spennandi við tveimum kirkjum. Ein eldri bygdarkirkja og so tann nýggja kirkjan í Hoyvík. Ein spennandi avbjóðing at boða orðið um Jesus inn í eldri eins væl og nýggjar karmar. Ein avbjóðing at vera sálarhirði í lítlari bygd og avmarkaðum øki. Og so Hoyvík við nógvum yngri familjum, børnum og tilkomnum fólki.

Umsóknarfreistin var úti í dag 5. juni kl. 15.
4 umsøkjarar eru til kallið. Ætlanin er at innstilla prestin innan summarsteðgin.
Landsstýrismaðurin útnevnir sóknarprestin og gevur setanarbræv. Um tað vignast væl, skipar dómprósturin tann komandi sóknarprestin í tað nýggja embætið við gudstænastu í Hoyvíkar kirkju 31. august 2014.

JF