Leiðreglur

Uppgávan hjá kirkjuráðnum
Kirkjuráðið skal saman við sóknarprestinum taka sær av kirkjuni sum bygningi og virka fyri tí kirkjuliga lívinum í sóknini við at veita góð kor fyri lívi og vøkstri í trúskapi móti lærugrundarlagnum hjá fólkakirkjuni.

Kirkjuráðið stjórnar kirkjuni í kirkjusóknini, hevur ábyrgd av fíggjar- og fyrisitingarviðurskiftunum, og tekur sær av dagliga rakstrinum av kirkjuni.

Aðrar uppgávur eru:

• at tryggja at kirkjan (bygningurin) er í góðum og nýtiligum standi
• at hava eftirlit við at økið rundan um kirkjuna er tignarligt
• at kalla fólk til tænastuna sum kirkjutænarar: deknur, urguleikari og klokkari
• at taka sær av tí praktiska við atliti at sosialari samveru (kaffi v.m)
• at áseta klokkutíðina fyri gudstænastuni sunnu- og halgidagar
• at áseta dagin, tá ið tey ungu verða fermd
• at góðkenna ta kirkjuligu skipanina (liturgi), ið nýtt verður á staðnum
• at avgera talvudagarnar, um ella tá ið samlað verður inn undir gudstænastuni
• at velja 4 limir í Próstadømisráðið og ein lim í Føroya Stiftsstjórn
• at velja sóknarprest/dómpróst og biskup
• at vera virkin samstarvspartnari hjá presti / dómprósti / biskupi og Mentamálaráðnum, t.d. umvegis Felagið fyri Kirkjuráðslimir.

Nógv orka verður løgd í fyrireiking, uppmøting til gudstænasturnar og tiltøkini í kirkjuni. Fleiri kirkjuráðslimir eru eisini kirkjutænarar.

Sóknarpresturin
Sóknarpresturin er føddur limur í kirkjuráðnum og tess vegna partur av einum størri toymi. Eitt gott samstarv millum sóknarprestin og kirkjuráðið er ein fortreyt fyri einum góðum og nøktandi úrsliti.

Sóknarpresturin er ikki stjóri hjá kirkjuráðnum. Hann (m/k) er hirði og tænari. Sum limur í kirkjuráðnum er hann serkønur í kirkjumálum.

Hvat er so kirkjuráðið ikki?

Kirkjuráðið er ikki

• arbeiðsgevari hjá sóknarprestinum
• eitt ráð, ið ásetur ella hevur eftirlit við læruni hjá fólkakirkjuni.

Sum skrivað stendur í kirkjulógunum: ”Sóknarprestur er í embætisvirksemi sínum, eisini tá talan er um boðan og privata sálarsorg, óheftur av kirkjuráðnum.”

Soleiðis kanst tú stýra einum fundi á skynsaman hátt, fyri at fáa sum mest burturúr: 

Góður fundarsiður
Fyri at brúka tíðina hjá kirkjuráðunum skynsamt, er hent at hava ein skipaðan framferðarhátt til kirkjuráðsfundir.
§13 í Løgtingslóg um kirkjuráð og próstadømisráð nágreinar, at tað er forfólkið, sum skipar fundin og sendir innkalling til valdu kirkjuráðslimirnar og sóknarprestin. Les neyvari um krøv til kirkjuráðsfundir í nevndu lóg frá §13.

Niðanfyri finnist ein meiri almennur framferðarháttur um, hvussu fundarstjóri kann fara fram á skipaðan hátt fyri at fáa sum mest burturúr fundarvirkseminum.

• Send innkalling og skrá í góðari tíð
  Send eina nágreiniliga skrá við tilfari út í góðari tíð innan fundin. Ger greitt, at tilfarið skal lesast innan fundin.
  Á tann hátt tryggjar tú, at øll hava somu vitan og sama grundarlag fyri viðgerðini av málunum.
  
  
• Byrja stundisliga
  Byrjað fundin stundisliga, hóast onkur ikki er møttur. Tað vísur, at tú hevur virðing fyri teimum, sum eru møtt stundisliga, og tryggjar at fundirnir gerast virknir frá byrjan.
  
  
• Greið frá ætlanini við fundinum
  Byrja fundin við at
  1) taluseta endamál, 
  2) nágreina hvat er á skrá,
  3) hvussu langa tíð tit hava, tvs. nær fundurin í seinasta lagi skal verða liðugur. Klokkutíðspunktið skal tryggja virkisføri, og at tit halda tykkum til evnini.
  
  
• Greið í stuttum frá hvørjum einstaka máli
  Byrja hvørt punkt á skránni við í stuttum at greiða frá, hvussu málið er íkomið. Um onkur ávísur eigur ábyrgdina av málinum, letur tú tann persónin greiða frá.
  
  
• Set opnar spurningar
  Tín uppgáva sum fundarstjóri er, at fáa fólk at siga sína meining, greiða frá sínum sjónarmiðum og royndum. Tí er hent at seta opnar spurningar, so allar síður av málinum vera lýstar.
  
  
• Drag samanum ymisk sjónarmið
  Við at draga samanum ymsu sjónarmiðini av og á, tryggjar tú tær, at tit koma víðari í kjakinum, heldur enn at tosa upp í saman.
  
  
• Enda hvørt einstakt mál við niðurstøðu
  Enda hvørt mál við eini roynd at finna semju, sum kann leiða til eina niðurstøðu:“Eru vit sostatt einig um, at...” ? Tað viðførur, at fundarluttakarar fáa møguleika at  greiða frá møguligum misskiljingum ella koma við ískoytum til málið.
  Síðani orðar tú endaligu niðurstøðuna, sum øll hoyra, umframt hvør skal útinna hana í praksis og ásetur eina møguliga deadline. Skrivarin tryggjar, at tað verður skrivað í fundarbókina.
  
  
• Raðfest mál um neyðugt
  Sært tú áleiðis á fundinum, at tit fara ikki at náa øll málini innan ásettu tíðina, raðfest  so heilt skjótt saman við teimum luttakandi, hvørji mál kunnu bíða til næsta fund.
  
  
• Enda fundin til tíðina
  Enda fundin ásettu tíð í virðing fyri fundarluttakarunum.
  
  
• Send fundarfrágreiðing skjótast gjørligt
  Send fundarfrágreiðing skjótast gjørligt aftaná fundin. Flyt mál, har ongin niðurstøða var, til næsta fund, og tak tá evnið uppaftur. Á hendan hátt, tryggjar tú tær, at onki mál steðgar upp.

Atgongd til kirkju t-postin finnist á forsíðuni. 

Alt samskifti millum kirkjuráð til Próstadømisráð og Føroya Stiftsstjórn skal fara fram frá kirkju t-postinum, heldur enn frá privatari ella arbeiðs t-post adressu.

Mælt verður til, at einans forfólkið hevur atgongd til kirkju t-postin. 

Um tú hevur gloymt loyniorðið til kirkju t-postin, skalt tú seta teg í samband við Jórun Johannesen, fulltrúa í Próstadømisráðnum við at ringja tel. 237324. 

Kirkju t-post á tína telefon
Ynskir tú sum forfólk at móttaka kirkju t-post á tíni telefon, finnist vegleiðing frá Føroya Tele her.

Freistir
Roknskapurin skal lastast inn til grannskoðaran beint eftir nýggjár. 
Tá roknskapurin kemur aftur til kirkjuráðið, skal hann undirskrivast og sendast aftur til grannskoðaran, sum síðani sendir hann til Próstadømisráðið. 

Grannskoðarin skal lata Próstadømisráðnum roknskapin í seinasta lagi tann 1. apríl. 

Um grannskoðarin ikki hevur lisið tølini inn á skemaini, má forfólkið í kirkjuráðnum tryggja, at hetta verður gjørt.

Fíggjarætlan
Kirkjuráðið skal lata Próstadømisráðnum fíggjarætlan í seinasta lagi
tann 1. juni.

Størri kirkjur
Tær stóru kirkjurnar eiga javnan ígjøgnum árið at kanna eftir, hvussu nógvan pening kirkjan hevur eftir á teimum ymsu kontunum.

Roknskapur og fíggjarætlan skal sendast til stift@folkakirkjan.fo frá
T-post adressuni hjá kirkjuráðnum. 

Kirkjuráðið sum arbeiðsgevari kann innstilla kirkjutænara til Den Kongelige Fortjenstmedalje. 

Viðkomandi skal hava starvast í 40 ár uttan frávik hjá sama almenna arbeiðsgevara og framvegis vera í starvi.

Les vegleiðing frá Ríkisumboðnum um, hvussu farast skal fram.

Skjøl til innstilling
1 Ein skrivlig grundgeving skal fyriliggja frá kirkjuráðnum sum arbeiðsgevara.
   (Prestur hevur atgongd til skabelón á Glottanum, um neyðugt.)

2 Kirkjuráðið skal útfylla oyðublað frá Rigsombudsmanden.

Grundgeving og oyðublað skal sendast beinleiðis til Ríkisumboðið á t-posti: ro@fo.stm.dk 

Er ynski um, at biskupur skal veita medaljuna, er hent at boða honum frá samstundis, sum umsóknin verður send Ríkisumboðnum.

Viðgerðartíðin er áleið 5 mánaðir, og umsóknin skal tí sendast Ríkisumboðnum í góðari tíð.

Ásett er í LL. nr. 61 frá 7. Juni 2007 um fíggjarviðurskiftir fólkakirkjunnar, 
hvussu lántøka vegna kirkjuna kann fara fram. 

Í §1 verður víst á, at tað er kirkjuráðið, sum umsitur kirkjukassan hjá kirkjuliðnum í kirkjusóknini. Í §3 er nágreinað, hvat kirkjukassin fíggjar. 

Tað er Ikki er loyvt at skuldarbinda ogn kirkjunnar uttan loyvi frá landsstýrismanninum.  Landsstýrismaðurin kann loyva skuldbinding eftir tilmæli frá stiftsstjórnini. (§4) 

Mannagongd
Út frá omanfyristandandi lóg, er fylgjandi mannagongdin og siðvenja galdandi, tá ið eitt kirkjulið/kirkjuráð tekur lán vegna kirkjuna:

▪ Kirkjuráðið avger á fundi at taka eitt lán.   
▪ Avgerðin verður bókað í gerðabókina og undirskrivað.
▪ Kirkjuráðið tosar við ein peningastovn um lán og treytir, rentu v.m.
▪ Kirkjuráðið sendir eina umsókn til Próstadømisráðið (PR) við neyðugum
  upplýsingum frá bankanum, um loyvi at taka lán.
▪ PR sendir eitt tilmæli til Føroya Stiftsstjórn (FSS) um lánið.
▪ FSS sendir eitt tilmæli um Almanna- og heilsumálaráðið (AMMR)
▪ AMMR svarar kirkjuráðnum

Kirkjugrunnurin veitir trygd fyri láninum
Lánið verður afturgoldið umvegis skipanina hjá fólkakirkjuni, ið er Kirkjugrunnurin. Skipanin er trygd fyri, at lánið verður afturgoldið. Í skipanini koma vanligur landskirkjuskattur (0,6%) og staðbundin kirkjuskattur (max. 0,3%)

Afturrindan
Kirkjuráðið rindar lánið við peningi, ið kirkjuráðið fær úr Kirkjugrunninum. Kirkjuráðslimir hefta ikki persónliga fyri einum láni til kirkjuna, ið kirkjuliga skipanin og AMMR hava givið loyvi til.

Tá ið bæði PR og FSS hava tilmælt lántøku, og AMMR hevur givið loyvi til at taka lán, so er samlaða Fólkakirkjan trygd fyri, at lánið verður afturgoldið.

Starvsfólk kunnu fáa skattafríar gávur í naturalia* frá arbeiðsgevara sínum, um keypsprísurin ikki fer upp um eitt vist.

Naturaliagávur eru sambært hesum skattafríar, um keypsprísurin í mesta lagi er 1.500 kr. við mvg.
Í sambandi við 25, 30, 40 og 50 ára starvsdag kann keypsprísurin tó vera ávikavist 2.000, 3.000, 4.000 ella 5.000 kr. við mvg. Er hann størri enn ávístu upphæddir, skal skattur gjaldast av fullari upphædd.

Peningagávur frá arbeiðsgevara til starvsfólk eru altíð skattskyldigar.

*) Naturaliagávur eru gávur, sum ikki eru peningur, t.d. matvørur, klæðir, list, amboð o.tíl.

kelda: TAKS

Søkjast kann um loyvi til, at limir fólkakirkjunnar í kirkjusóknini rinda staðbundnan kirkjuskatt eftir somu reglum sum landskirkjuskatt og saman við honum.

Kirkjuráðið metir um ávísa fíggjartørvin og søkir umvegis próstadømisráðið stiftsstjórnina um loyvi til at krevja inn staðbundnan kirkjuskatt. 

Loyvið verður givið eftir tilmæli frá stiftsstjórnini, tá ið kirkjan á staðnum tørvar pening til ávíst endamál í eitt ávíst áramál.

Staðbundni kirkjuskatturin kann í mesta lagi vera 0,30 % av skattskyldugu inntøkuni, og loyvda tíðarskeiðið at innheinta staðbundnan kirkjuskatt fylgir altíð kalendaraárinum. 

Umsókn
Lýsing av verkætlanini skal fyriliggja saman við fíggjarætlan. Umsóknin skal vera Próstadømisráðnum í hendi innan 1. august. 

Leingjan av staðbundnum kirkjuskatti
Um staðbundin kirkjuskattur er játtaður ávíst áramál, men neyðugt er við longri áramáli, - má kirkjuráðið senda nýggja umsókn um leingjan av staðbundnum kirkjuskatti, innan upprunaliga loyvda tíðarskeiðið gongur út.
Próstadømisráðið skal hava móttikið umsóknina innan 1. august sama árið, sum verandi loyvið gongur út.

Sí meiri um staðbundnan kirkjuskatt í §13 í Lóg um fíggjarviðurskifti fólkakirkjunnar.

Stroyming er at leggja livandi video- og ljóðupptøkur út á internetið, so ávísir bólkar ella øll kunnu fylgja við í einum tiltaki, meðan tað fer fram. 

Mannagongd
Upptøkutólini skulu stillast soleiðis, at tað ikki er gjørligt at eyðmerkja áhoyrarar, sum eru tilstaðar. Fólk, sum eru til gudstænastu ella jarðarferð kunnu vera í sorg ella í aðrar mátar sinnisrørd, eins og tað fyri mong er ein persónlig og trúnaðarlig handling. Tá ið fólk fara til altars, ella tá kistan verður borin út, skulu upptøkutólini skifta vinkul ella setast á pausu fyri at verja persónliga frælsið og eginfriðin hjá tí einstaka.

Skelting
Tað skal kunnast væl um upptøkur og stroyming við at skelta týðiliga, so fólk hava møguleika at at skipa seg soleiðis, at tey ikki koma á upptøkuna.

Samtykki
Prestur, deknur og onnur sum kunnu eyðmerkjast á upptøkunum, skulu geva samtykki til upptøkurnar og stroymingina. Verða upptøkur goymdar hava tey, sum kunnu eyðmerkjast rætt at taka samtykki aftur, soleiðis at viðkomandi partar skulu strikast.

Stroyming á Internetinum
Verða upptøkur lagdar á YouTube ella Facebook er talan um flutning til útlond, og skal hetta fráboðast Dátueftirlitinum.
Stroyming á YouTube og facebook skal strikast so skjótt stroymda tiltakið er liðugt.

Um kirkjuráð hava møguleika at stroyma er alneyðugt, at stórt atlit verður tikið til, at treytirnar í sambandi við stroymingina verða hildnar við virðing fyri hinum einstaka persóninum og tí kirkjuligu tænastuni.

Kelda:
Løgtingslóg nr. 80 frá 7. Juni um vernd av persónsupplýsingum
Dátueftirlitið – um stroyming

Um at loysa sóknarband
Kirkjufólk hoyrir til kirkjusóknina har tað býr, uttan so at viðkomandi hevur biðið um at hoyra til aðra kirkjusókn í prestagjaldinum.

Kirkjufólk kann knýta sóknarband til sóknarprest og kirkjusókn í øðrum prestagjaldi.

Mannagongd
Tann, ið ynskir at loysa sóknarband, vendir sær til sóknarprestin, sum viðkomandi ynskir at knýta sóknarband til.
Sóknarpresturin útfyllur oyðublað, og tryggjar, at tað verður skrásett í protokol fyri sóknarbandsloysarar.

Sóknarband heldur uppat
Sóknarbandsloysing heldur uppat, um sóknarprestur doyr ella fer úr starvi. Uppathaldið kann tó verða flutt fram, til nýggjur sóknarprestur er settur í embætið.

Kelda: § 8 í Løgtingslóg um at brúka kirkju og limaskap í fólkakirkjuni 

Í mun til kirkjuráðsval, er seinasta freistin at loysa sóknarband 3. týsdag í august í valárinum. Víkjast kann ikki frá freistini.

Hvussu nógvir limir skulu veljast í kirkjuráðið?
Føroya Stiftsstjórn fær tal á limum í fólkakirkjuni og limum við valrætti í hvørjari kirkjusókn sær, og sendir til kirkjuráðini, hvussu nógvar limir skulu veljast. 
Limatalið nágreinar, hvussu nógvir kirkjuráðslimir skulu veljast í staðbundnu kirkjuni. 

Hvar fæst valevnislisti og stillaralisti?
Føroya Stiftsstjórn sendir kirkjuráðunum valevnislista og stillaralista at útfylla.

Valstýrið sendir Føroya Stiftsstjórn valevnis- og stillaralista aftur við nøvnum í bókstavarøð og undirskrift frá valevnum og stillarum. Valstýrið upplýsir somuleiðis Føroya Stiftsstjórn um, hvar valstaðið er.

Hvør lýsir við valinum, valevnum og valstaði?
Føroya Stiftsstjórn kunngerð alment valevnislistar og valstað nakað undan valinum. Prestur kann lýsa við kirkjuráðsvalinum til gudstænastuna 1- 2 sunnudagar undan valinum við fráboðan um, hvør er uppstillaður. 
Kirkjuráðini kunnu lýsa sjálvi á sosialu miðlunum.

Hvør ger atkvøðulistan?
Kirkjuráðið hevur ábyrgd av at lata prenta atkvøðulista. Nøvnini skulu vera í bókstavarøð.

Hvør sendir valkort til teirra við valrætti?
Umhvørvisstovan veitir valstøðunum umvegis Føroya Stiftsstjórn lista yvir borgarar, sum hava valrætt, og sendir valkort til hvønn kirkjuráðslim við atkvøðurætti við Posta.

Hvussu við teimum, sum ynskja at nýta brævatkvøðu?
Kommunurnar veita fysiskar umstøður til at velja við brævatkvøðu. Umsitingin í Biskupsgarði sendir kommunum brævatkvøður. 

Valstýrið ferð við tveimum umboðum út til teirra, sum ikki megna at koma á valstaðið, og ynskja at velja við brævatkvøðu.
Valstýrið fær brævatkvøður frá umsitingini á Biskupsgarði við at siga frá.

Hvussu við teimum, sum ikki hava móttikið valkort?
Hesi skulu siga valstýrinum frá. Valstýrið kannar um viðkomandi er skrásett/ur sum limur í fólkakirkjuni á Umhvørvisstovuni. 
Tá limaskapur er staðfestur, kann valstýrið skriva navnið á vallistan (listan yvir borgarar við valrætti) og nýtt valkort verður skrivað á valstaðnum. 
Valstýrið fær sjálvt til vega tóm valkort. 
Valstýrið kann rætta í vallístanum fram til og við valdagin (§12 í LL um kirkjuráðsval)

Nær letur man brævatkvøðurnar upp?
Áðrenn atkvøðugreiðslan byrjar, letur valstýrið móttiknu brævbjálvarnar upp, kannar um persónurin, ið brævbjálvin er frá, stendur á vallistanum, og um so er, verður beinanvegin settur krossur við navn veljarans á vallistanum. (§28 í LL um kirkjuráðsval) 

Hvat ger man tá fleiri valevnir hava sama atkvøðutal?
Stendur á jøvnum, verður lutakast. (§29 í LL um kirkjuráðsval)

Hendan vegleiðingin er í høvuðsheitinum gjørd við útgangsstøði í Løgtingslóg nr. 107 frá 17. august 2009 um val til kirkjuráð v.m.

Biskupur
kunnar kirkjuráðini og almenningin í góðari tíð um nær val verður, og tryggjar at nøktandi kunning og umrøða um valið er fram til uppstillingina og sjálvt valið.

Valstýrið
Hvørt kirkjuráð hevur smb.  § 9 stk. 7 í LL nr. 27 frá 19. mai 2008 um kirkjuráð og próstadømisráð valt eitt valstýri á teirra fyrsta fundi, ið skipar valið í kirkjusóknini, tá valskeiðið gongur út. Valstýrið skal vera umboðað av limum í kirkjuráðnum.

Talið á kirkjuráðslimum
Biskupur fær talið á limum í fólkakirkjuni og limum við valrætti fyri hvørja kirkjusókn sær frá Umhvørvisstovuni, og sendir til kirkjuráðini. Limatalið er útgangsstøði fyri, hvussu nógvir kirkjuráðslimir skulu veljast. 

Talið á valdum kirkjuráðslimum er 4 fyri tey fyrstu 59 kirkjufólkini í kirkjusóknini. Í kirkjusókn við 60-999 kirkjufólkum eru 6 limir í kirkjuráðnum. Talið á limum verður síðani økt við einum limi fyri hvørji 1000 kirkjufólk, tó so, at í mesta lagi eru 12 valdir limir.

Val skal vera í størri kirkjusóknum
Í kirkjusóknum við 500 og fleiri kirkjufólkum skal vera val, sjálvt um einans ein listi kemur inn. Kemur einans ein listi inn, er val millum teirra, ið eru á listanum.

Friðarval
Í kirkjusóknum upp til 499 kirkjufólk kann verða friðarval, um einans ein listi kemur inn. Um so er, skulu stillararnir raðfesta valevnini, og siga frá, hvør kemur at sita í kirkjuráðnum sum valdur limir, og nagreina hvørji eru eykafólk.

Valevnislisti og stillaralisti
Umsitingin í Biskupsgarði sendir við t-posti kirkjunum oyðublað til bæði  valevnislista og stillaralista í góðari tíð innan valið. 

Valevnislisti
Í mesta lagi 9 nøvn fleiri enn tey, ið veljast kunnu í kirkjuráðið, kunnu vera á valevnislistanum.Valevni skulu skriva undir listan, ella vátta áhugan at stilla upp t.d. í teldubrævi.
Oyðublað til valevnislista verður sendur við t-posti til allar kirkjur.

Stillaralisti
Í minsta lagi skulu vera 3 stillarar og í mesta lagi 25 stillarar til ein vallista.
Serligur listi /oyðublað yvir stillararnar skal fylgja við valevnislistanum. Á listanum yvir stillararnar skal verða upplýst: Navn, starv og bústaður. Stillari skal undirskriva á stillaralistan.
Oyðiblað til stillaralista verður sendur við t-posti til allar kirkjur.  

Valevnir og stillarar skulu sostatt ikki skrivast á sama oyðublað.

Valevnislisti latast inn
Ein stillari skal lata valevnislista og stillaralista inn til forfólkið í valstýrinum. Stillarin kann fáa kvittan ella váttan fyri, at valevnislistin er handaður forfólkinum í valstýrinum.
Váttanin fyri móttøku skal hava bæði dagfesting og klokku.

Bókstavarøð
Valevnini koma á valevnislistan í bókstavarøð.

Einki listasamband
Einki listasamband er millum tveir ella fleiri listar.

Einans á einum lista
Stillar eitt valevni upp á meira enn einum lista, verður valið ógildugt fyri viðkomandi, og atkvøðutalið hjá viðkomandi verður ikki talt við.

Er ein persónur stillari á tveimum ella fleiri listum, verður viðkomandi ikki roknaður sum stillari á nøkrum lista.

Góðkenna valevnislistan
Valstýrið skal formliga á fundi góðkenna valevnislistarnar, ið síðani fáa sítt egna talmerki (1,2,3) alt eftir raðfylgjuni, sum teir koma valstýrinum í hendi.

Valstýrið sendir bæði valevnislista og stillaralista til Føroya Stiftsstjórn, saman við fráboðan um, hvar valstaðið verður. Valevnislistin skal vera í bókstavarað, og atkvøðuseðilin til valið skal hava somu raðfylgju av nøvnum, sum valevnislistin, ið verður latin inn.
Føroya Stiftsstjórn miðlar alment um valevnir og valstøð, tá valdagurin nærkast.

Brævatkvøður
Sjófólk og onnur, sum ikki eru heima valdagin, kunnu atkvøða við brævi í fyrsta lagi 5 vikur undan valdegnum. Veljari, sum er í landinum, kann í fyrsta lagi atkvøða við brævi 1 viku undan valdegnum.

Umsitingin í Biskupsgarði sendir brævatkvøður út til allar kommunur. Kommunurnar skulu skipa fyri fysiskum umstøðum, so til ber at velja har. 
Ber ikki til at koma á valstaðið, kunnu 2 umboð frá valstýrinum fara við brævatkvøðu heim til borgara at velja við brævatkvøðu. 
Valstýrini kunnu fáa brævatkøvður á Biskupsgarði ella heinta hjá staðbundnu kommununi. 

At loysa sóknarband
merkir, at kirkjufólk kunnu knýta sóknarband til sóknarprest og kirkjusókn í øðrum prestagjaldi enn tí, har tey búgva. 

• Kirkjufólk biðja um at hoyra til eina aðra kirkjursókn enn hana, har viðkomandi býr.
• Kirkjufólk venda sær til sóknarprestin, ið viðkomandi ynskir at hoyra til.
• Sóknarpresturin kann siga ja ella nei til umbønina um at loysa sóknarband.
• Viðkomandi, ið loysir sóknarband, kann fara á kirkjuráðsval í kirkjusóknini, har viðkomandi ynskir at hoyra heima ella í kirkjusóknini, har viðkomandi býr.
• Áheitanin um at koma á vallistan í kirkjusóknini, har viðkomandi ikki hevur bústað, skal skrivliga latast formanninum / forkvinnuni í valstýrinum í kirkjusóknini, har kirkjufólkið ynskir at inna valrættin.
• Í mun til val, er seinasta freistin at fáa hesi viðurskifti í rættlag er 3. týsdag í august í valárinum. 
• Undantak verður ikki givið frá tíðarfreistini.
  
  

Atkvøður
Veljarin greiðir atkvøðu við at seta kross við annaðhvørt ein lista ella eitt valevni.

Atkvøðuseðlar verða ógildir:
1)   um brúktir verða aðrir atkvøðuseðlar enn teir, ið valstýrið hevur útvegað,
2)   um ikki við vissu ber til at gera av, hvørjum valevni ella hvørjum valevnislista veljarin hevur atkvøtt fyri,
3)   um meira enn ein krossur er á atkvøðuseðlinum,
4)   um annað frámerki er á atkvøðuseðlinum.

Stk. 2. Harumframt í sambandi við brævatkvøðu:
1)   um seðlar, fylgibrøv og brævbjálvar, sum biskupur hevur útvegað, ikki eru brúkt,
2)   um annað ella meira enn ein atkvøðuseðil er í einum brævbjálva.

Hetta er ásett í §30 í lógini um val til kirkjuráð.

Kærufreist
Kæra um valið skal vera biskupi í hendi í seinasta lagi 5 yrkadagar aftan á valið. Biskupur ger úrskurð í seinasta lagi 5 yrkadagar eftir, at hann hevur fingið kæruna.
Kærarin ella valstýrið kunnu innan 5 yrkadagar skjóta avgerð biskups inn fyri landsstýrismannin. Landsstýrismaðurin ger úrskurð í seinasta lagi 5 yrkadagar eftir, at hann hevur fingið kæruna. Úrskurður landsstýrismansins er endaligur innan fyrisitingina.

Kirkjuráðini eiga tí aftaná fínteljing at goyma atkvøðuseðlarnar á tryggum stað til kærufreistin er farin.

Tá kirkjuráðið hevur skipað seg
skal fráboðast Próstadømisráðnum skrivliga hvørjir limirnir eru, og hvussu kirkjuráðið hevur skipað seg við ávikavist: 

• forfólki
• næstforfólki
• kassameistara
• skrivara
• forfólki í valstýrinum
• eykalimum

við at senda t-post til stift@folkakirkjan.fo

Sí framløgu við kunning um kirkjuráðsval her.

Val til próstadømisráð og stiftsstjórnina fer fram samstundi tann 25. mars 2026. 

Valevnis- og stillaralisti (felags ásetingar fyri bæði valini)

• Valevnislistin skal vera valstýrinum í hendi í seinasta lagi mikudagin 25. februar 2026 kl. 13.00.
• Kirkjuráðslimirnir og sóknarprestarnir kunnu vera stillarar.
• Valbærir eru allir limir í fólkakirkjuni, sum lúka treytirnar fyri at verða valdir í kirkjuráðið.
• Valevnini eru stillað upp javnbjóðis og í bókstavarøð.
• Ein listi skal hava í minsta lagi 9 stillarar og í mesta lagi 25 stillarar.
• Valdagurin er mikudagin 25. mars 2026.
• Valið fer fram á einum kirkjuráðsfundi.

Atkvøðuseðlar

• Atkvøðuseðlar verða sendir øllum kirkjuráðum mánaðarskifti feb/mars
• Bert kirkjuráðslimi frá at møta, skal eykalimur kallast inn.
• Atkvøðugreiðslan kann fara fram á fundi í kirkjuráðnum í tíðarskeiðinum frá 4. mars til 25. mars 2026.
• Kirkjuráðslimirnir og sóknarprestarnir hava valrætt.
• Atkvøðuseðlarnir skulu vera valstýrinum í hendi í seinasta lagi
  25. mars 2026 kl. 13.00.
• Einans ein krossur skal setast á atkvøðuseðilin. Krossurin skal setast í teigin út fyri einum valevni ella út fyri einum lista.
  
  Litir á atkvøðuseðlum
• Atkvøðuseðilin til val til Føroya Stiftsstjórn er reyður og skal latast í tann reyða brævbjálvan.
• Atkvøðuseðilin til val til Próstadømisráðið er bláur og skal latast í tann bláa brævbjálvan.

Praktisk viðurskifti 
Oyðublað til valevnis- og stillaralista verður sendur øllum kirkjuráðum at nýta.
Valevnis- og stillaralisti skal sendast til stift@folkakirkjan innan 25. februar 2026. kl. 13.00.
Atkvøðuseðlar, ávikavist reyðir og bláir, verða sendir øllum kirkjuráðum í góðari tíð innan valið.

Próstadømisráðið 

• Veljast skulu 4 limir.
• Á listanum kunnu vera í mesta lagi 12 valevni.
• Valið verður gjørt upp sum lutfalsval.
• Ikki er loyvt valevnislista at skipa listasamband við annan valevnislista.

Føroya Stiftsstjórn

• Veljast skal ein limur.
• Á listanum kunnu vera í mesta lagi 3 valevni.
• Ikki er loyvt valevnislista at skipa listasamband við annan valevnislista.

Valstýrið
Í valstýrinum eru Bergur Berg, ráðgevi í Uttanríkis- og mentamálaráðnum, Maria Jørðdal Niclasen, dómpróstur og Jógvan Fríðriksson, biskupur. 
Valstýrið skipar valið saman við umsitingini í Biskupsgarði.

Tað eru kirkjuráðslimir, íroknað sóknarprestar, sum hava valrætt. 

Løgtingslóg um val til kirkjuráð, próstadømisráð og stiftsstjórn finnist her.

Tak niður oyðublað at skráseta, hvussu kirkjuráðið hevur skipað seg her. 

Skjalið skal sendast frá kirkju t-postinum til stift@folkakirkjan.fo

Soleiðis skipar kirkjuráðið seg á fyrsta fundi:

§ 5. Nývalda kirkjuráðið skipar seg á fyrsta fundi. Fyrsti fundur er, áðrenn valskeiðið byrjar, og tá skal kirkjuráðið vera fullmannað. Fyrst valdi kirkjuráðslimur gevur fundarboð og leiðir fundin, til formaður er valdur. Eru tveir ella fleiri limir valdir við eins nógvum atkvøðum, leiðir elsti teirra fundin.

Stk. 2. Berst kirkjuráðslimi frá at møta á fyrsta fundi, fær varalimur fundarboð. Varalimur verður boðsendur, tá ið kirkjuráðslimur hevur forfall. Varalimur tekur sæti í kirkjuráðnum, tá ið kirkjuráðslimur fer úr ráðnum ella doyr.

§ 6. Áðrenn nývaldur kirkjuráðslimur tekur sæti í kirkjuráðnum, skal hann á kirkjuráðsfundi vátta við trú og heiður at vilja inna tað starv, sum litið verður honum til, í trúskapi móti lærugrundarlagnum hjá evangelisk-luthersku fólkakirkjuni, soleiðis at hon kann bjóða kirkjuliðnum góð kor fyri lívi og vøkstri.

Stk. 2. Stiftsstjórnin sær til, at kirkjuráðslimur verður kunnaður um arbeiðið í kirkjuráðnum og hvørjar skyldur áliggja honum.

§ 7. Kirkjuráðslimurin, ið hevur boðað til fyrsta fundin, skipar fyri formansvali. Valið er skrivligt og loyniligt. Valrætt og valbæri hava valdir limir í kirkjuráðnum.

Stk. 2. Tá ið formaður er valdur, skipar hann fyri næstformansvali. Valið fer fram sbrt. regluni í stk. 1. Er valdi formaðurin ikki á fundi, skipar næst valdi kirkjuráðslimur fyri næstformansvali.

§ 8. Formaður og næstformaður verða valdir fyri eitt ár í senn.

Stk. 2. Kirkjuráðslimur hevur skyldu til at taka við vali sum formaður ella næstformaður. Limur hevur tó einans skyldu til at taka við vali sum formaður í 4 ár.

Stk. 3. Fráfarandi formaðurin skipar fyri formansvali millum valdu limirnar í kirkjuráðnum, áðrenn formansskeiðið er runnið. Formaður og næstformaður verða valdir sbrt. § 7.

Stk. 4. Er serlig orsøk, kann kirkjuráðið eftir áheitan loysa formann ella næstformann úr starvi, tað ið eftir er av ávikavist formansskeiðnum ella næstformansskeiðnum. Fer formaður frá, áðrenn formansskeiðið er runnið, skipar næstformaðurin fyri nýggjum formansvali og um neyðugt eisini næstformansvali eftir reglunum í § 7, galdandi fyri restina av skeiðnum.

§ 9. Kirkjuráðið velur millum valdu limir sínar kirkjuverja og kassameistara. Valrætt hava valdir limir í kirkjuráðnum. Formaðurin kann ikki verða valdur kassameistari.

Stk. 2. Kirkjuráðið velur millum limir sínar ein skrivara.

Stk. 3. Kirkjuráðið ger starvsskipan fyri starvsøkini hjá kirkjuverja, kassameistara og skrivara.

Stk. 4. Eru bert tríggir valdir limir í kirkjuráðnum, kunnu teir býta álitissessirnar sínámillum við friðarvali.

Stk. 5. Kirkjuráðið velur millum valdu limir sínar ein, sum fær heimild saman við formanninum at skriva undir skjøl viðvíkjandi keypi, sølu og øðrum fyriskipanum í sambandi við fastogn og upptøku av láni.

Stk. 6. Til at virka sum kassameistari ella kirkjuverji kann kirkjuráðið tilnevna kirkjufólk, sum ikki eru í kirkjuráðnum. Tey kunnu møta á fundi; men hava ikki atkvøðurætt.

Stk. 7. Tá kirkjuráðið hevur skipað seg, velur tað valstýri við 3 limum, sum verða valdir við lutfalsvali millum limirnar í kirkjuráðnum. Kirkjuráðið velur ein av teimum trimum valdu valstýrislimunum til valstýrisformann.

Stk. 8. Valini sambært stk. 1, 2, 5, 6 og 7 eru fyri valskeiðið.

§ 10. Kirkjuráðið sendir, um próst, biskupi fráboðan um, hvussu tað hevur skipað seg. Kirkjuráðið sendir somuleiðis fráboðan um broytingar í kirkjuráðnum, sum fara fram seinni.

Stk. 2. Undir gudstænastuni eftir fyrsta kirkjuráðsfundin kunnger sóknarprestur, hvørji eru vald í kirkjuráðið, og hvussu kirkjuráðið hevur skipað seg. Er lestur, lesur deknur kunngerðina.

Kelda: Løgtingslóg um kirkjuráð